شمار رايت

شمار بايت

رسامة تستقيل من الجريدة بعد أن إنتقدت عمك زااتو في كاريكاتير!

كتب الانجرافي : خاص خرطون

• شماربايت

قررت رسامة الكاريكاتير (آن تيلنايس) الاستقالة من عملها في صحيفة "واشنطن بوست" الأميركية بعد أن رفض مدير التحرير(ديفيد شيبلي) نشر كاريكاتير يظهر فيهومالك الصحيفة (جيف بيزوس) ، ايوة نعم مالك الصحيفة الشغالة فيها – شجاعة والله - ورسمت معاهو كبار المسؤولين الإعلاميين من بينهم بيزوس، مالك ومؤسس "أمازون". و (ايلون ماسك و مارك) بيظهروا وهم يقدمون أكياسا من المال، و ينحنون ليقدموا شروط الولاء والطاعة أمام الرئيس (دونالد ترامب).

أها برراحة بعد ما كتبت استقالتها مشت كتبت بوست يوم الجمعة الفاتت رسالة على منصة "سابستاك" قالت فيها كان الهدف منه انتقاد "رؤساء تنفيذيين في مجال التكنولوجيا والإعلام الذين بذلوا جهدهم لكسب ود الرئيس المنتخب ترامب". واتهمت الرسامة المعنيين في الكاريكاتير بالحصول على عقود حكومية مربحة والعمل على إلغاء اللوائح التنظيمية. وقالت إنه لم يسبق لها أن تعرضت لرفض رسم كاريكاتيري بسبب رسالته الجوهرية، وإن مثل هذه الخطوة تعتبر خطيرة على حرية الصحافة واعتبرت (تيلنايس) أن هذا الرفض يمثل تغييرا كبيرا، لانو قبل كده ما حصل رفض ليها أي كاريكاتير سابق بسبب مضمونه السياسي، وقالت دا الفساد الخايفة منوزااااتو!! وإنو ح يشكل خطر على حرية الصحافة.

• بقية الشمار

العالم كلو شاف الكاريكاتير يعني لو الشبلي دا خلى الكاريكاتير ينزل كان خلاص راح شمار في مرقة .. لكن عشان كسير التلج في البرد ما حلو .. عايز يبسط المديرجابها كبيرة وبقى خاشي في ضفورو مع العالم، و اتشتم بالكلام وبالاقلام لانو جمعية رسامي الكاريكاتير الأميركية طلعت بيان يوم السبت طوالي حار حار اتهمت فيهو واشنطن بوست بـ "الجبن السياسي"، ودعت رسامي الكاريكاتير كلهم في البلد وحول العالم إلى نشر الكاريكاتير تضامنا مع (تيلنايس).

أها مدير التحرير (ديفيد شيبلي) نكر الموضوع (نكرت كوشيب لإسمو) و قعد يلولو في الكلام، في بيان لوكالة (ترامبية) صرح وقال إنه يختلف مع "تفسير تيلنايس للأحداث". وأضاف أنه قرر رفض الرسم لأنو تم نشر عمود في الصحيفة حول الموضوع نفسه!!!!"

يعني شنو؟ عليكم الله هسي دا عذر ليهو ..يعني الرسامة حتجيب مواضيع من الفضاء الخارجي ؟

بعد داك قام عدل كلامو وقال ..إنو كان حينشر الكاريكاتير لكين في زحمة بتاعت مواضيع مشابهة !!!

وقعد يعدل ويعدل ولليلة الله ماوفقوا يقول كلام منطقي.

وأثارت استقالة تيلنايس نقاشات حول حرية التعبير ودور وسائل الإعلام، وتلقت دعما من جمعيات الرسامين، التي وصفت الموقف بأنه "خضوع سياسي" خطير.

• خرطون تنشر الكاريكاتير تضامنا مع حرية التعبير و(آن تيلنايس)

#خرطون

# تيلنايس

#الانجرافي

#جرفة_في_الارجاء